Artista intimista, conta máis de 20 anos de traxectoria forxada en numerosas exposicións individuais ou colectivas como: "Illados" no castelo de Santa Cruz(cadro que representa esta exposición), "Los ojos de Ulises" na Fundación Exponav en Ferrol, o Salón internacional de otoño en Sarria, "Atlánticos" na República das artes en Vilanova de Cerveira, "Vestixios" no Centro Cultural Marcos Varcálcel en Ourense, "100 títulos" no Forum Cultural Vilanova de Cerveira, "Espazos interpretados" e a colectiva quinto aniversario nos espazos de arte Virxe da Cerca, entre outros moitos proxectos.

A contemplación da súa obra remítenos inmediatamente ao realismo americano do século XX, un estilo que fai seu creando unha linguaxe propia e persoal no que a arqutectura é a protagonista: fábricas, paisaxes industriais, madeireiras, arsenais, estacións, espazos interpretados nos que a figura humana non aparece representada pero está presente nos seus vestixios, nas súas pegadas. É precisamente esta interpretación da arquitectura, a súa observación da paisaxe e natureza, e unha especial sensibilidade no tratamento da luz (clara influencia dos impresionistas) o que fai que encontremos na obra de Mila Vázquez unha inusual beleza, en paisaxes cotiás propias da crónica urbana.