3 DE OUTUBRO - NENO DE ELXE & GALLAECIA ENSEMBLE BARROCO

Baixo a dirección artística da violinista galega María José Pámpano, Gallaecia Ensemble Barroco e Neno de Elxe presentan un novo programa de concerto no que revisitan o repertorio sacro de temática mariana para levalo a outro territorio: o do humano, o profano, o íntimo. A música de Antonio Vivaldi, Heinrich Ignaz Biber, Marco Rosano e outros compositores atravesa o tempo para atoparse coa voz e a mirada do presente, nun diálogo no que a música antiga deixa de ser memoria para converterse en materia viva que atende á sensibilidade contemporánea. Un concerto no que o sagrado e o profano atopan un territorio no que mirarse de face. No que se traspasa a imaxe do divino e a figura de María aparece como reflexo do humano. Porque detrás da icona, detrás da coroa, detrás da imaxe perfecta, permanece a nai. E con ela, a infancia. A vulnerabilidade. O medo. O coidado. A perda. Un lugar no que o divino descende. Faise carne. Faise voz. Faise nena. Faise neno. Faise nai. Gallaecia Ensemble Barroco e Niño de Elxe mergúllanse neste territorio para regresar ás músicas do pasado e escoitalas de novo, poñéndoas diante do noso tempo.

4 DE OUTUBRO - CHICHARRÓN & SARA ZOZAYA

Da intensidade pop atlántica de Chicharrón ao pop ambient de Sara Zozaya, Euskadi e Galicia integran a saudade tempestuosa dos seus mundos nunha lingua propia na que ambas as propostas suliñan o poder melódico de achegar nunha voz os poderes climáticos dun son que bebe tanto do pálpito cru como dun liricismo aerostático, de beleza contemporánea e atemporal, do que tamén bebe "Temporal", novo LP dos galegos, que presentarán para a ocasión.

18 DE OUTUBRO - MERCEDES PEÓN & CLARA PEYA

Nesta ocasión tan especial, Mercedes Peón propón unha relación musical cara ao acústico, rodeada doutras creadoras, xuntas transitarán por temas cargados dunha enerxía expansiva, atravesando paisaxes sonoras e cinematográficas que percorren a traxectoria de Peón. A través da composición e da improvisación, a banda de Mercedes Peón irromperá en escena para fundirse coa de Clara Peya, nun encontro no que música e espazo transfórmanse continuamente. A relación entre Mercedes e Clara ocupará tamén o espazo escénico, avanzando cara a unha progresiva conversión sonora que dará lugar a un ambiente único, íntimo e emotivo.

25 DE OUTUBRO - A Pedreira & BEAUTIFY JUNKYARDS

Que Beautify Junkyards é o grupo máis relevante do pop portugués nestes últimos anos é tan evidente como a relevancia de Noticia "" ou "Cosmorama", LPs nos que os lisboetas fixeron de Stereolab e da psicodelia británica o camiño para profundar na alma lusa de GNR e outras propostas que colindan coa pulsión experimental da Pedreira, nun cruzamento de camiños no que a parte galega representa a verbalización máis profunda da condición lusófona da nosa música.