Francisco Pillado foi un artesán da fotografía e deixou detrás de si centos de negativos, moitos dos cales, positivados, empezaron a saír do arquivo familiar para ser rescatados do esquecemento. Unha parte importante son fotografías da Coruña e as súas xentes, que Francisco Pillado González (A Coruña, 1892-1977) retratou de forma incansable entre os anos vinte e setenta.

Unha Coruña pequena, que empezaba na Cidade Vella e pouco menos que terminaba na praza de Ourense, e que el percorreu unha e mil veces en busca da mellor perspectiva ou a escena costumista máis auténtica. Outras son imaxes familiares. En todas poñía esmero no encadre - ás veces de gran modernidade e beleza formal - e nas sombras.