Film performance con proxeccións de fotografías, filmacións en super 8, diapositivas pictóricas, filmes en 16 mm realizados sen cámara e manipulacións sonoras

A sección Desbordamentos ábrese este ano con esta proposta cinematográfica en directo elaborada conxuntamente pola fotógrafa Branca Viñas e o cineasta Albert Alcoz. A noite inventada aúna fotografías e películas nunha experimentación artística que pon en diálogo tratamentos ópticos, filtros de cores, procesos fotoquímicos, intervencións plásticas, sonoridades e múltiples proxeccións. Rexistrar escenarios exteriores, documentar procesos creativos e pintar sobre celuloide son os puntos de partida dun conxunto de pezas que reflexionan sobre a natureza da imaxe estática e a imaxe en movemento. Para facelo interrelacionan consideracións estéticas relativas ás dicotomías abstracción/figuración, silencio/ruído, cor/branco e negro, positivo/negativo. Proxeccións de fotografías, filmacións en super 8, diapositivas pictóricas e filmes en 16 mm realizados sen cámara forman o núcleo da sesión.