Na proxección estará presente o director do documental, José Manuel Colón Armario, e unha das voluntarias que aparece na produción, a ourensá Mafalda Soto.

Black Man White Skin é unha película documental de 78 minutos de duración que reflicte a situación á que se enfrontan millóns de albinos en África, vítimas do cancro de pel pero, sobre todo, perseguidos, asasinados e mutilados polas mafias. Ante a falta de melanina, as mulleres e homes albinos que viven en África padecen devastadores cancros de pel, que acaban coas súas vidas entre os 25 e os 30 anos, pola falta de recursos que lles permitan protexerse do sol, a incomprensión e o feito de vivir nunha das zonas máis calorosas do planeta. Ao perigo que supón para elas e eles a súa delicada pel, súmase unha ameaza maior, a das crenzas dos falsos feiticeiros que lle atribúen aos negros albinos poderes curatorios que lles converten en vítimas da persecución e o xenocidio: «as mafias trafican cos seus corpos –denuncia o documental– e mátanos, unha terrible realidade que naceu en Tanzania e que se estendeu por toda a África subsahariana.»