"Tocaron a gaita en Terranova, en Namibia, no mar do Carburo; fixeron música mestiza e cosmopolita antes de que existisen esas palabras"

Así resume Xurxo Souto a historia de "Dous gaiteiros do mar", o documental producido por Borneira Audiovisual. Nesta cinta recupérase o relato dos gaiteiros-mariñeiros que nos anos sesenta e setenta embarcaron cara ao Gran Sol. As voces que recolle o documental pertencen a Manuel Sotelo (Manoliño De Donón) e Lito de Pinténs. A súa historia é a historia da música tradicional lonxe da terra, das gaitas máis aló da terra firme, ao outro lado do noso horizonte.

Eles son os gaiteiros do mar deste documental que, segundo Souto, servirá para provocar o "descubrimento dun mundo" que descoñecemos na Galicia. "Hai gaiteiros do mar que non coñecemos, dos que non sabemos nada. Ben seguro que despois deste documental, descubriremos moitos máis", sinala Xurxo Souto.