A Asociación de Amigos da Casa das Ciencias organiza en colaboración co Aquarium Finisterrae unha actividade para nenos e nenas de 10 e 12 anos na que realizarán talleres sobre a bioloxía dos tiburóns ou quenllas (identificación, reprodución, alimentación etc.) e durmirán na Sala Nautilus rodeados de peixes e quenllas.

Convocaranse tres sesións para os meses de maio e xuño, dirixidas a nenos e nenas nacidos entre o 1 de xaneiro de 2014 e o 31 de decembro de 2015, cun máximo de 20 prazas por sesión, e desenvolveranse nun horario que se estende desde as 20.00 horas dun venres ata as 11.00 horas do sábado seguinte.

A preinscrición para as tres sesións, que serán o 29 de maio e o 19 e 26 de xuño, abrirase en liña ás 9.00 horas do 4 de maio neste formulario. Terán preferencia os nenos e nenas que non acudisen á actividade con anterioridade.

Cada participante empregará o seu saco de durmir, esteira e neceser para o aseo persoal, e deberá levar a súa propia comida e utensilios.

Programa de actividades en cada sesión

Venres

• 20.00 horas. Chegada e recepción no Aquarium Finisterrae.
• 20.30 a 22.00 horas. Taller sobre bioloxía dos tiburóns. Itinerario para identificar as especies do acuario, comezando no módulo de incubación de ovos destes peixes. Empezamos o taller de manualidade para facer un dente de quenlla.
• 22.00-22.30 h. Cea.
• 22.30 h. Alimentación de melgachos e patarroxas na sala de corentena.
• 23.30 h. Retirada para durmir na Sala Nautilus.

Sábado

• 09.00-10.00 h. Diana, aseo, almorzo.
• 10.00-11.00 h. Rematamos o taller facendo un dente de quenlla.
• 11.00 h. Recollida das persoas participantes.