Dani Arias, formado na escola de Imaxe e Son da Coruña, é reporteiro gráfico e cámara na Televisión de Galicia. No campo da fotografía realizou importantes series e porfolios en Gambia, Romanía, Turquía, India e recentemente en Mongolia. En 2012 e 2014 recibe o Premio Mellor Imaxe Concurso Marco Polo, con fotografías tomadas no Río Omo, sur de Etiopía.

No Casino Atlántico, Dani Arias presenta unha composición de imaxes, en branco e negro, meticulosamente realizadas, cunha profundidade estética e un tratamento máis conceptual: "A exposición propón unha viaxe onírica, a porta de entrada a algo distinto a través de espazos e elementos cotiáns, que simplemente espera a ser sentida e vista, doutra maneira".