A ONG recolle a través de 25 fotografías o traballo que fai coas vítimas de violencia sexual no país africano e os diferentes aspectos da vida das mulleres en Kivu Norte e Oriental, provincias nas que Farmamundi e os seus socios locais desenvolven os seus proxectos desde hai máis de 10 anos para mellorar as condicións de vida e saúde das mulleres e das súas familias.

Con estas instantáneas a cor, tomadas por cooperantes de Farmamundi no país, e diversos paneis informativos, a exposición convida ao visitante a facer un interesante percorrido sobre como afecta a desigualdade de xénero, a inequidade e a violencia sexual á saúde das mulleres que viven na República Democrática do Congo, coñecido como “o peor país do mundo para nacer muller”.