O cantautor Franco Battiato soubo rodearse de bandas de rock indie e artistas novos que, sen dúbida, servíronlle para lograr ese público variado (son coñecidas as súas colaboracións con Antony & the Johnsons, Los Planetas..) O gran mestre da canción de autor italiana, sempre esmerado por cantar verdades contemporáneas, actuará o próximo 24 de xullo no Palacio da Ópera da Coruña.

Cando se menciona o nome de Franco Battiato o máis probable que é que veña á mente Nómadas, o título do álbum que o encaramou no noso país a finais da década dos oitenta, e no que se incluían temas como Yo quiero verte danzar, Bandera blanca ou Vía láctea. Aquel traballo, que reunía material novo e algo máis anello reunido para o noso mercado e foi gravado en castelán, foi todo un supervendas alá por 1987, pero calquera que se tomou a molestia de furgar algo máis alá da nostalxia, caerá na conta de que o compositor italiano leva máis de tres décadas forxando unha carreira absolutamente incansable, durante a que rebuldou ao seu antollo coa música experimental, as sonoridades orientais, a música clásica, o pop e mesmo a dirección dun par de longametraxes.

En definitiva, cantautor de pop, compositor de música clásica e experimental, cineasta, pintor, escritor... hai moi poucos artistas da actualidade aos que se poida atribuír aquilo do home do Renacemento sen que soe a tópico. Battiato -de quen resulta imposible resumir a súa traxectoria nunhas poucas liñas- é iso e moito máis, un auténtico xenio da música italiana, que despois de estrear unha ópera, facer un disco de pop e colaborar con Antony Hegarty, volveu nos seus últimos concertos ao seu lado máis vangardista co proxecto Joe Patti's Experimental Group.

Na Coruña teremos a oportunidade de gozalo repasando os seus grandes éxitos xa convertidos en clásicos, nunha nova mostra da vixencia do seu inesgotable talento.

VENDA DE LOCALIDADES

Despacho Central da praza de Ourense: de luns a venres (excepto festivos) de 9.30 a 13.00 e de 16.30 a 19.30 h.

Despacho do Palexco: día do concerto (sempre que queden entradas dispoñibles)

Televenda: 902 044 226 (de luns a venres de 9.00 a 22.00 h; sábados de 14.00 a 22.00 h; domingos de 16.00 a 21.00 h)