O considerado por público e crítica como mellor monologuista cómico do país, deleitará o público cos seus mellores momentos revisados desde o momento actual da súa vida. Non se trata dun recompilatorio ao uso, xa que nada en Goyo é usual, así que o espectador verase inmerso no porqué dos monólogos e poderá volver lembrar algúns dos seus mellores momentos pero desde unha visión diferente e como sempre con momentos novos e hilarantes.

Por que esa fixación cos americanos? Por que cambiou despois de 10 anos e creou outros 5 espectáculos diferentes?

Neste espectáculo poderás rememorar os mellores monólogos de Goyo Jiménez explicados por el e como xa te darás conta con moitas novidades que non viches en TV ou noutros espectáculos, xa que aquí poderás ver que o show cambia por días e cada día verás algo novo que non viches antes e que probablemente só o poidas ver ese día.

Todo iso coa barroca e exhaustiva posta en escena de Goyo Jiménez, quen explota de novo neste espectáculo todos os seus recursos expresivos de corpo e voz ao servizo da diversión e a transmisión de emocións e sensacións, de forma detallista e virtuosa. É esta particular forma de construír os seus man shows, precisamente, a que lle valeu o recoñecemento de crítica e público.

Habitual do programa El Club de la Comedia, Goyo foi elixido como Mellor Monologuista polas audiencias da serie, ademais conta con máis de 400.000 seguidores en Twitter, e os extractos do seu anterior espectáculo 'Aiguantulivinamerica', colgados en Youtube, recibiron máis de seis millóns de visitas. Coas súas actuacións en directo superou longamente a cifra do millón de espectadores, e nos cinco anos que leva actuando na Gran Vía de Madrid e no Paralel de Barcelona, non deixou de colgar o cartel de 'entradas esgotadas' cada semana.