LOCALIDADES ESGOTADAS

Amazing Grace 50th. A Gospel Tribute To Aretha Franklin será a contribución de Grandes do Gospel ao cincuenta aniversario dunha das gravacións que aínda seguen influíndo nos estándares de interpretación da música afroamericana.

A realización desta produción, que presentará integramente as cancións do LP orixinal e algúns hits de Aretha Franklin, non sería posible sen a participación apaixonada dos protagonistas desta historia: The Black Heritage Choir, unha selección de cantantes de Mississippi Mass Choir, que baixo a dirección musical de Jerry Calvin Smith, organista da Grater Fairview Missionary Baptist Church, profesor da Jackson State University e pianista da gran coral do estado de Mississippi, traerán de volta a Europa o son do gospel no Nadal de 2022.

Aretha Franklin gravou Amazing Grace no corazón negro dos Angeles fai cincuenta anos. O 13 e o 14 de xaneiro de 1972 nunha pequena igrexa do barrio de Watts, a New Amorne Missionary Baptist Church, volveu ser a filla do predicador e deixou para a historia do Gospel, coa colaboración de James Cleveland e a coral Southern California Community Choir, o seu disco máis vendido. Entre a expectante audiencia de fans do barrio e un feixe de hipsters californianos brillaban algunhas estrelas da América negra e unha lenda do rock internacional que aínda non sabía que era inmortal. Clara Ward, unha das grandes influencias de Aretha e fundadora das Famous Ward Singers; o Reverendo CL Franklin, o home coa voz dun millón de dólares, pai da Raíña do Soul e principal apoio de Martin Luther King; sen esquecer a un novísimo Mick Jagger, que sempre recoñeceu a súa débeda con xeracións de bluesmen e músicos anónimos.

Amazing Grace é un dos discos máis belos da música popular do século XX. O seu repertorio, con chiscadelas á modernidade de Marvin Gaye e Carole King e perlas da nova tradición creada por Thomas Dorsey e Herbert Brewster, está sacado dos libros de himnos que se podían atopar en calquera igrexa negra desde Memphis, Tennessee, a Detroit, Michigan, na Idade Dourada do Gospel.

A nena de igrexa que foi Aretha convoca nesas sesións, coa voz poderosa dunha gran cantante en plena posesión de todos os seus rexistros, imaxes e sentimentos dun pasado recente común a toda a congregación.

O resultado é conmovedor, porque os membros do coro, os músicos e o público comparten os códigos secretos que ocultan as cancións que saben de memoria.

Por todo iso Amazing Grace ten un eco da maxia que só poden ter os concertos en directo, feitos de calor, de humanidade e de alegría. É tamén un canto de nostalxia polos bos vellos tempos e unha emotiva reivindicación dos homes e mulleres que fixeron posible desde as igrexas negras dos Estados Unidos, a cultura do gospel.

Ligazón a vídeo

https://youtu.be/UNbMS9rfm7Q?t=4

VENDA DE LOCALIDADES

• Venda en liña: Ataquilla.com
• Venda no despacho de billetes do Teatro Colón unicamente días de espectáculo desde dúas horas antes (sempre que queden localidades dispoñibles)
• Venda no despacho de billetes central da praza de Ourense: de luns a venres de 11.00 h a 15.00 h e de 16.30 a 19.30 h (excepto festivos)