Voltamos celebrar coa ALA (American Library Asociation), asociación profesional de bibliotecas, o International Games Week, que este ano se converte no International Games Month (Mes Internacional dos Xogos) na Biblioteca Durán Loriga, xogando, que é a mellor forma que atopamos de facelo!

Facemos así unha homenaxe durante todo o mes de novembro ao valor educativo, recreativo e social dos xogos.

Comezamos o sábado 19 de novembro, da man de Alejandro Mosquera, que presentará a Baralla galega, como se xoga con ela e todas as posibilidades lúdicas que ofrece.

A Baralla Galega é un xogo de cartas que versiona a baralla tradicional española para ilustrar en 40 cartas parte da cultura galega cun tono humorístico. A vieira, a cunca de viño, o fouciño e o pemento de Padrón son os catro elementos representativos da cultura popular que conforman os catro paos do xogo. As figuras rompen a xerarquía masculina da baralla tradicional e introducen á meiga (personaxe da mitoloxía popular), a vaca rubia galega e a gaiteira.

Invitámosvos a asistir cos vosos xogos preferidos, a disfrutalos individualmente, en familia ou cuadrilla.

Estarán as portas da Biblioteca Durán Loriga abertas de 10:00 a 14:00h. para disfrutar dos xogos! Esperámosvos!