Ivo Pogorelich naceu en Belgrado en 1958. Aos sete anos recibiu a súa primeira clase de piano e con doce anos trasladouse a Moscova para estudar piano na Escola Central de Música e posteriormente no Conservatorio Tchaikovsky. En 1976 iniciou estudos intensivos coa célebre pianista e profesora Aliza Kezeradze, coa cal casou en 1980 e estivo casado ata a súa morte prematura en 1996. En 1978 Ivo Pogorelich gañou o Concurso Internacional de Casagrande en Terni (Italia) e en 1980 o Concurso Internacional de Música de Montreal. Con todo, foi o premio que non gañou o que o fixo mundialmente famoso. En 1980 presentouse ao Concurso Internacional Chopin de Varsovia, onde a súa eliminación na terceira volta desatou unha feroz controversia e atraeu a atención de todo o mundo musical cara ao pianista.

Dende o seu recital de debut no Carnegie Hall de Nova York en 1981, as actuacións de Ivo Pogorelich causaron sensación en todas as grandes salas de concertos do mundo: nos Estados Unidos, Canadá, Europa, Xapón, Sudamérica e Israel. Foi convidado para tocar con numerosas grandes orquestras como a Orquestra Filarmónica de Berlín e a Orquestra Filarmónica de Viena, todas as orquestras de Londres, a Orquestra Sinfónica de Chicago, a Orquestra Sinfónica de Boston, a Filarmónica de Nova York e a Orquestra de París. Alí onde toque, as súas soberbias interpretacións da música confirman a orixinalidade do seu talento e intelecto. O ‘New York Times' escribiu, "Tocou cada nota exactamente, con tal sentimento, tal expresión, que el é unha orquestra completa".

Ivo Pogorelich apoia a numerosos mozos músicos. En 1986 estableceu unha fundación en Croacia cuxo obxecto era recadar fondos para outorgar bolsas destinadas a que novos artistas continuasen os seus estudos no estranxeiro. Dende 1989 realízase en Bad Wörishofenthe o Festival Ivo Pogorelich: o obxecto do festival é apoiar a novas promesas da música ao principio das súas carreiras dándolles a oportunidade de actuar xunto a famosos artistas. En 1993 realizouse por primeira vez o Certame de Piano Ivo Pogorelich en California.

En 1994, o pianista creou unha fundación en Saraievo co fin de recadar fondos para construír un hospital e ofrecer asistencia médica á xente de Saraievo. Así mesmo, Ivo Pogorelich ofrece moitos concertos benéficos para apoiar, por exemplo, a Cruz Vermella, a reconstrución de Saraievo, ou a loita contra enfermidades tales como o cancro e a esclerose múltiple. Un dos seus obxectivos foi e segue sendo axudar os artistas novos impartindo clases maxistrais por todo o mundo. En 1988 foi nomeado pola UNESCO ‘Embaixador de Boa Vontade'.

Ivo Pogorelich asinou en 1982 un contrato en exclusiva para Deutsche Grammophon. Realizou máis de 15 gravacións con DGG como Sonatas de Piano de Mozart, Suites de Bach, Sonatas de Piano de Liszt e Scriabin e o Concerto Nº 1 de Piano de Tchaikovsky. O seu máis recente CD, é a Sonata para Piano Nº 2 de Chopin, Ravel Gaspard da Nuit e a Sonata para Piano Nº 6 de Prokofiev.

Nos últimos anos tocou repetidamente en Europa, Europa do Leste, Israel, Estados Unidos e Asia (Xapón, China, Taiwan).