O luns 22 de setembro ás 19 h., na Biblioteca Fórum Metropolitano, temos a Charla "Francisco Miguel e a articulación dunha modernidade galega truncada" a cargo de Carmela Galego

Acceso libre até completar capacidade

Organizado pola ARMH, a Asociación de Veciños Oza, A Gaiteira, Os Castros, e coa colaboración da Deputación da Coruña.

RESUMO:

O ensanche burgués dunha pequena cidade do occidente europeo como punto de partida. O apoio dunha mente inquieta e unha man áxil. Francisco Miguel habita unha das épocas de maior esplendor da historia da  arte contemporánea e a navega con soltura. Definíase a si mesmo coma un clásico e desde a súa destreza academicista entra nun diálogo directo coa vangarda internacional que sosega e incorpora a súa propia linguaxe estética. Desde París até Cidade de México e de novo A Coruña. Regresa cunha maleta e unha paleta cosmopolita que compartiu e espallou. A brutal maquinaria  fascista deixou coa súa morte un dobre baleiro, o dos lenzos nunca trazados  e dos  lenzos silenciados. Unha voz que nos foi arrebatada.

Baixo este título sumarémonos ao esforzo colectivo para analizar e recuperar o papel de Francisco Miguel na arte galega e universal.

CARMELA GALEGO:

Licenciada en Historia da Arte pola Universidade de Santiago de Compostela, e posúe unha diplomatura e un mestrado en Educación pola Universidade da Coruña.

Ao longo da súa traxectoria profesional combinou a docencia coa xestión cultural, a divulgación e o comisariado. É profesora de Historia da Arte para a UNED e mestra de Francés na Consellería de Educación da Xunta de Galicia. Desde hai máis dunha década desenvolve proxectos para o Programa de Lecer Cultural no Concello da Coruña e na Agrupación Cultural Alexandre Bóveda, entidade da que actualmente é vicepresidenta.

Desde o ano 2020 investiga a figura de Francisco Miguel en colaboración directa entre a Asociación para a Recuperación da Memoria Histórica e a Agrupación Cultural Alexandre Bóveda.