O luns 2 de outubro ás 19.00 h na Biblioteca Municipal do Fórum Metropolitano teremos a presentación do libro "Hogar" de María Nieto publicado por Aliar Edicións.

SINOPSE:

Que pasa cando a vida obriga a reformular as nosas decisións pasadas, a reabrir as feridas e enfrontarnos aos traumas que logramos sepultar? Iso é o que está a piques de pescudar Ana, unha muller na recta final da trintena, que conseguiu construír unha vida cómoda e eficiente sobre os cascallos dun corazón roto.

Con case corenta anos, un grupo de boas amizades, unha familia coa que mantén boa relación e un traballo que lle gusta, aínda que non o apaixone, Ana leva case quince anos construíndo unha vida que dista moito de ser a que desexa, pero que, está convencida, é a que lle convén. Todo ese autocontrol e esa fachada de satisfacción caen cando o seu pai falece repentinamente e aparece en escena Daniel, un novo artista que elixiu un camiño oposto ao seu e polo que sentirá unha atracción incontrolable, que a obrigará a enfrontarse a si mesma.

Co seu pasado volvendo á superficie e un futuro que non sabe se pode controlar ante ela, Ana terá que tomar decisións que poden cambialo todo para sempre... estea preparada para iso, ou non.

BIOGRAFÍA:

María Nieto, nada na Coruña en 1979. É escritora de contos profesional desde o ano 2002, en que terminou xornalismo na Facultade de Ciencias da Información da Universidade Complutense de Madrid e comezou a traballar como comunicadora. Desde entón nunca deixou de contar historias, aínda que deixou de facelo nos medios para pasar a facelo desde os gabinetes de prensa política e empresarial e posteriormente desde a súa propia axencia de comunicación. Compaxina o seu traballo como directora de comunicación coa súa paixón pola literatura. Publicou varios ensaios e artigos xornalísticos en libros corais. En 2021 publicou o seu primeiro poemario, "Lo que pudo haber sido, lo que es, lo que nunca será"  (Zasbook, 2021).

"Hogar" é a súa primeira novela.