MIRANDO AL MAR é un CD de boleros chegados ata aquí desde o outro lado do Atlántico, arrastrados polas súas correntes, interpretados ao gusto das sereas. Temas que falan de amor e desamor, de paixóns que aboian ou se afunden entre augas turbulentas, de travesías para corazóns temerarios, afeitos ao sabor do salitre.

Un CD gravado e masterizado na cidade durante este ano 2015 e que se presentará no Teatro Colón o xoves 10 de decembro. Este espazo emblemático da Coruña resulta idóneo para acoller a presentación desta proposta artística, tanto pola súa localización, céntrica a carón do porto, como polo seu acondicionamento, que garante o goce do espectáculo contra vento e marea.