Esta idea de still life serve así como un modo, dos centos que pode haber, de achegarse á obra dun dos artistas máis ousados á vez que reflexivos que existen (nótese que non se di "cineasta", que non deixaría de ser un termo tramposo ou insuficiente á hora de referirse a Malcolm Le Grice). A idea de still life serve na medida en que Le Grice empeza a súa andaina como pintor, e na medida en que varias das súas obras fan alusión directa a ese xénero e utilízano á maneira dos pintores antes citados para investigar o propio cinema como soporte, desligándose da narración ou do suposto rexistro realista da realidade, para investigar de maneira plástica, reflexiva e performativa iso que coñecemos como cinema. A película é, pois, a propia tira de celuloide ou conxunto de píxeles, non as hipotéticas mazás do bodegón en movemento, e é tamén o que ocorre mentres o espectador a mira, nese "aquí e agora" da proxección na que cada un de nós constrúe a súa propia película.

Esta selección de películas de Le Grice, aínda que breve e parcial, serve para dar conta das múltiples formas que adoptou esas ambicións ao longo do tempo, desde que empezase a experimentar co soporte fílmico nos anos sesenta no seo da soada London Film-makers Co op (na que tivo un papel crucial, non só como artista senón poñendo en marcha o taller no que se producirían moitas das obras da cooperativa), pasando polas súas primeiras experiencias con ordenadores nos setenta, o paso definitivo ao vídeo nos oitenta e a explosión de posibilidades do dixital.

Programa 2

• LITTLE DOG FOR ROGER

  Malcolm Le Grice, Reino Unido, 1968, 16mm, 13 min.

  Little Dog For Roger está feita a partir de fragmentos dunha película doméstica de 9.5mm que o meu pai filmou da miña nai comigo e cun can que tiñamos. Este material vagamente nostálxico deume a oportunidade de xogar co soporte fílmico e con varias clases de dispositivos de impresión e procesado. As calidades do cinema, as perforacións, os fotogramas individuais, a deterioración tanto do rexistro como da memoria; todo iso xoga un papel importante no significado desta película. (M.L.G.)

• WHARF

  Malcolm Le Grice, Reino Unido, 1968, performance con diapositivas transferida a vídeo, 8 min.

  Orixinalmente o traballo presentábase como unha secuencia preordenada de diapositivas de 35mm que mostraban a dous descoñecidos camiñando arredor do muro dunha piscina xunto ao mar. Pasando do foco positivo ao negativo sobre o misterio dun relato escondido e irresolto entre os "amantes?". En ocasións este traballo mostrábase en superposición con partes da película Talla. Dúas cintas de audio mesturábanse improvisando en vivo. (M.L.G.)

• NEITHER HERE NOR THERE

  Malcolm Le Grice, Reino Unido, 2001, vídeo, 8 min.

  Afganistán visto desde a televisión -pero en plano detalle- tocando a pantalla -non trata sobre Afganistán senón sobre a incapacidade de tratar sobre Afganistán- o espectáculo da guerra de lonxe -creando unha resistencia ás verdades e mentiras da televisión -escéptico pero non cínico. (M.L.G.)

• FOR THE BENEFIT OF MR K

  Malcolm Le Grice, Reino Unido, 1995, vídeo, 1 min.

  Para os Beatles e para Franz Kafka -que ten que ver a casiña de K con El proceso ou El castillo? (M.L.G.)

• TRAVELLING WITH MARK

  Malcolm Le Grice, Reino Unido, 2003, vídeo, 5 min.

  Manipulación dixital que explota o mosaico transcódigo dun vídeo gravado durante unha viaxe en tren de Berlín ao sur de Alemaña con Mark Webber. Transformacións de secuencias seleccionadas, retardadas, recoloreadas, comparadas. Novos ritmos -lentos pensamentos nun tren de alta velocidade- unha paisaxe borrosa e fragmentado a través da xanela. O son está feito manipulando a frecuencia do son do tren rexistrado no vídeo. (M.L.G.)

• DENISSINED

  Malcolm Le Grice, Reino Unido, 2006, vídeo, 3 min.

  Catro fotografas de Dennis Oppenheim ordenadas nunha secuencia que se repite en forma de palíndromo (o primeiro desta peza) 1-2-3-4-3-2-1-2, copiada a distintas velocidades e animada, é logo copiada na súa totalidade para logo sumarse á primeira en reverso, formando esta suma un segundo palíndromo. A música recibe o mesmo tratamento que a imaxe: trátase do "Canon Cangrexo" de Bach, composición tamén en forma de palíndromo, aquí en MIDI. Poñen a guinda a este pastel reversible os títulos do principio e do final da peza, palíndromos en referencia ao ANEMIC CINEMA de Duchamp (un título parcialmente palíndromo).

• SELF PORTRAIT AFTER RABAN TAKE MEASURE

  Malcolm Le Grice, Reino Unido, 2008, vídeo, 8 min.

  Este autorretrato busca unha aproximación á relación específica entre a duración dunha obra e as condicións materiais da súa proxección, do mesmo xeito que facía William Raban no seu filme performance Take Measure. A principal diferenza é que o traballo de Raban foi feito cando o soporte cinemático tiña unhas propiedades distintivas que o ligaban directamente coa imaxe. Este autorretrato recoñece que xa non existe esa materialidade simple no cinema tras a emerxencia do dixital. A obra toma entón outra base conceptual -a velocidade da luz e o tempo que lle leva á luz viaxar desde o sol para iluminar a terra-, e de aí a súa duración, 8 minutos e 20 segundos. (M.L.G.)

• JONAS, 2013

  Malcolm Le Grice, Reino Unido, 2013. vídeo, 3 min.

  Un retrato espontáneo de Jonas Mekas filmado na Serpentine Gallery, en Londres, na celebración do seu 90 aniversario. Todo feito nunha soa toma mentres Mekas gravaba en vídeo a Mike Figgis tocando o fiscorno e a Rosey Chan tocando o piano. (M.L.G.)

• EVEN THE CYCLOPS PAYS THE FERRYMAN

  Malcolm Le Grice, Reino Unido, 1998, vídeo, 17 min.

  Unha alegoría da pasaxe entre a vida e a morte -máis aló da continuidade da vida dos outros- a reconstrución das enerxías físicas a partir da deterioración física -o cíclope é o pai chosco -o rei chosco na terra dos cegos -o lente único da cámara -tres pantallas máis aló da estereoscopia. (M.L.G.)