Concepción Arenal foi unha galega extraordinaria que se adiantou ao pensamento feminista peninsular do século XIX. Demóstrao coa súa idea de que "a sociedade non pode, en xustiza, prohibir o exercicio honrado das súas facultades á metade do xénero humano".

A cuestión feminina, a cuestión social e a cuestión penal son tres eixes sobre os que vertebra o seu pensamento ético, feminista e humanista.

Pioneira no seu tempo, do feminismo e, nun sentido amplo, dos dereitos humanos, o seu legado segue vivo, vixente e, con todo, insuficientemente coñecido entre nós. Foi, porén, unha das figuras máis recoñecidas do seu tempo no ámbito internacional.

__________________________________________________________________________

MARÍA XOSÉ PORTEIRO GARCÍA (Madrid, 1952) é licenciada en Publicidade e Relacións Públicas, xornalista e escritora.

Viviuen Cuba ata os 14 anos, cando a súa familia retornou a Galicia, onde desenvolveu a maior parte do seu traballo en comunicación, en xestión cultural e na política.

Desde 1972 traballou en prensa, radio, televisión e comunicación corporativa.

Publicou con X. A. Perozo o libro "Quen é quen no primeiro Parlamento Galego" e "Celso Emilio Ferreiro, compañeiro do vento e das estrelas".

Publicou as novelas "Covardes", "Sándalo" e "Buscando a Clara".

Publicou o relato "Novelas para Xulia " no libro colectivo "Libres e Vivas" e o ensaio "Vin, vin e falei! As mulleres fronte ao discurso público".

En 2021 publicou a reedición en castelán da novela Covardes (Belagua) e #taméneu, de opinión feminista.

Foi concelleira en Vigo (1987/1991 e 2003/2007), parlamentaria galega (1991/1997), deputada no Congreso (2004/2007), representante das Cortes españolas na Asemblea parlamentaria do Consello Europeo (2005/2007) e Delegada de Galicia en Arxentina e Uruguai (2007/2009).

Traballou na organización da Capitalidade cultural europea de Compostela en 2000.

Entre 2009 e 2011 dirixiu o Museo do Ferrocarril de Madrid-Delicias e foi directora de comunicación da Fundación dos Ferrocarrís Españois.

É membro do plenario do Consello da Cultura Galega desde 2014 e directora do Centro de Documentación en Igualdade e Feminismos (CDIF) desde 2017.

En 2019 foi elixida adxunta ao Defensor do Pobo.

Feminista comprometida cos dereitos humanos recibiu en 2009 a encomenda ao Mérito Civil polo seu traballo en acción exterior; en 2019, o premio Primeiro de Maio de CC.OO. ao compromiso social e á solidariedade en 2020, o Ernestina Otero, polo seu labor e traxectoria feministas.

María Xosé Porteiro García tivo ao longo da súa vida unha traxectoria intelectual e política caracterizada polo seu galeguismo, feminismo e progresismo.