É unha cita obrigada todos os veráns. Cada mes de agosto o ceo ofrécenos un fermoso espectáculo, a chuvia de estrelas fugaces das Perseidas, que este ano terá o seu pico de actividade na noite do 12 ao 13. E as condicións son particularmente favorábeis xa que a Lúa, en fase nova, non ocultará coa súa luz o brillo das tamén coñecidas coma “Bágoas de San Lourenzo”, pois é arredor da data en que se conmemora o martirio do santo cando se converten en protagonistas do firmamento nocturno.

Despois da medianoite, apagaranse as farolas da zona do paseo do Parque de Eirís (próxima aos restos da coñecida como "Torre de Valparaíso") e até as 3 da mañá teremos oportunidade de disfrutar do ceo nocturno e da chuvia de estrelas.