Aceptarías a oportunidade de non ser normal? Rafael Keller é esquizofrénico e ve monstros desde que ten memoria. Tras un novo fracaso ao saír do psiquiátrico, coñece un doutor que suxire abordar a enfermidade desde un novo ángulo: aceptar a posibilidade de non estar tolo. A partir dese momento, Raf entrará a formar parte da Sociedade do Veo e descubrirá todo un abano de criaturas lendarias que converterán a súa vida nun vórtice de tensión, carreiras e explosións. A soidade de non encaixar en ningún dos dous mundos empuxarao a aliarse co seu peor inimigo, un elfo amante do heavy metal responsable de acompañalo durante a súa formación na Axencia para a Protección do Veo.

Unha novela de corte policíaco dentro do xénero da fantasía urbana para adultos/as que atrapará as persoas lectoras máis esixentes grazas á evolución duns personaxes complexos, un estilo fluído, grandes doses de humor e unha elaborada rede de intrigas. Así como maxia, luxuria, pistolas e, desde logo, orcos, trasgos e outras bestas.