Cheikh Fayé era mestre en Senegal ata que emigrou e desde hai 14 anos reside na Coruña, onde hai tempo que espera lograr a nacionalidade. Comezou escribindo un blogue e agora vén de publicar o libro Ser Modou Modou, editado pola AS-PG. Modou Modou é o nome xenérico co que se coñece a un inmigrante africano a este lado do Mediterráneo. No libro, escrito en galego, dá conta de como é a vida dos inmigrantes africanos en Europa, a morriña pola súa terra e a loita cotiá por gañar un salario que lles permita manterse, a eles mesmos e á familia que quedou lonxe. Pero tamén é un libro cheo de referencia a heroes da cultura e da historia de Senegal coetáneos, como Léopold Sédar Senghor.