Unha temática á que, lamentablemente, segue sendo necesario dar visibilidade e que está de triste actualidade.

Durante os últimos meses ocorreron en España numerosos casos de acoso por discriminación sexual e agresións homófobas, dos que varios distritos de Madrid foron tristes protagonistas. Precisamente, hai tan só un par de días, o Observatorio Madrileño contra a LGTBfobia contabilizaba máis de 60 ataques deste tipo na comunidade no que vai de ano, 6 deles na última semana e os 6 na cidade de Madrid.

A pesar de que a nosa peza fala precisamente da intolerancia e a realidade destes crimes de odio, é unha proposta próxima ao espectador, sexa da idade que sexa. Para nós é máis que unha obra de teatro: é un posicionamento político e cultural, é teatro social ao que demos forma en talleres con persoas que sufriron acoso pola súa orientación sexual e con charlas-encontros co público. Demos tamén conferencias, realizamos actos de homenaxe a estas persoas asasinadas, falamos coas súas familias e visitamos os lugares onde foron asasinados, actuando en condicións moi adversas. Todo por dar visibilidade a persoas que viviron nas súas propias carnes crimes de odio.

Silenciados realizou xiras en países como Irlanda, Portugal, México, Italia ou Colombia e foi galardoado co premio Hilton Edwards á Mellor posta en Escena e ao Diálogo intercultural en Dublín, así como con Mención Especial nos festivais de FICTGay México DF, EITAI-Querétaro e La Rendija-Yucatán. Con esta montaxe participamos tamén no Festival Iberoamericano de Bogotá representando a España, onde foi elixido pola crítica como un dos 10 mellores espectáculos do Festival.