Se queres aprender e gozar dunha das grandes obras da literatura dunha forma animada e diferente; ¡¡VEN!! Os XOVES: 13, 20 e 27 de abril en horario de 17.30 h a 18.45 h na sala Fernando Rey do Fórum Metropolitano

Despois destes tres anos de pandemia nos que interrompemos unha tradición que levaba varios anos realizándose queremos recuperar a normalidade e convidámoste a achegarte ao Quixote, a entendelo entre todos e a interpretar a súa actualidade no noso século XXI así como a valorar por que segue sendo un best seller de verdade.

Situaremos a obra de Cervantes no seu contexto histórico-literario, seleccionaremos capítulos e temas representativos que comentaremos nas aulas e renderémoslle unha homenaxe á novela o último día, o 27 de Abril, xa que o aniversario da morte do autor , o 23 de Abril, Día do libro, este ano coincide en domingo.

Entre os distintos temas achegarémonos ao "da liberdade no Quixote", "O humor", "A ingratitude humana", ou o tema de tanta actualidade como "A defensa feminista da muller".

Na sesión do último día, o xoves 27 de abril, realizaremos a tradicional lectura de fragmentos do Quixote que se fai en todo o mundo hispánico pero cunha particularidade xa practicada outros anos:queremos que tamén participen os nenos de calquera idade.

Convidarémolos a ler un breve fragmento e comentarémolo. Quedará un bo recordo e co apoio dos seus profesores e familias, no momento acaído comezarán a lelo.