Un proxecto titulado The Soul Jazz Beat Vol. 1 (Freecode, 2015) que inclúe dez temazos capaces de devolvernos a esa época gloriosa da explosión de jazz soul (versións de Horace Silver, Lou Donaldson...) máis algunha composición orixinal. Para poñerse a bailar.

As comparacións son odiosas (din) pero hai que comentalo; ante un trío con órgano e guitarra eléctrica un agarda, indefectiblemente, algún tipo de herdanza do tándem Himmy Smith/Wes Montgomery, pero non é o caso. En primeiro lugar, porque Telmo Fernández (ao que coñecemos facendo dúo con Marcos Pin en Take A Second), é un guitarrista máis blueseiro ca Montgomery, cun toque máis agresivo, moi dentro da tradición sureña e da estética sonora do blues (máis visceral), esa dos vellos guitarristas americanos do Delta (e tamén do rock serio). En segundo lugar, porque o órgano, nas mans do inglés Phil Wilkinson é un elemento do soul moi negro, moi temperamental, absolutamente fóra do tempo e das modas polas que pasou Smith. A mestura é unha especie de festa negra con músicos brancos.