Neste espectáculo a voz de José Edelstein, físico e divulgador, convértese en fío condutor dun relato onde a ciencia fúndese coa poesía. A música de Lore Edelstein e a voz luminosa da cantante Daniela De Rito trazan constelacións sonoras que nos levan da orixe do universo, ás inquietudes máis esenciais do humano. Unha ponte entre o infinito e o íntimo, entre a beleza da arte e a verdade da ciencia. Unha invitación para mirar o ceo e descubrirnos nel a través de fermosas proxeccións astronómicas que envolven toda a escena.

En «Universo entre cancións» cóntanse historias, con toques de humor e momentos emotivos, que van desde o nacemento do universo, o ceo nocturno como un códice, a épica da súa exploración, o milagre das eclipses e o drama do terraplanismo, a vida e a súa complexidade, o determinismo e o azar, o noso lugar no cosmos e os segredos das súas leis máis íntimas: as da mecánica cuántica.

José Edelstein é profesor na Universidade de Santiago de Compostela e investigador do IGFAE, obtivo os premios FECYT en 2012 e o Prisma Casa das Ciencias en 2019 e 2023. Destaca o seu traballo como escritor e divulgador científico, sobre todo no seu papel como conferenciante e colaborando con diversos artistas en actividades que fusionan a ciencia e a arte.