Os/as participantes na visita poderán coñecer un centro de investigación e as funcións do IEO á sociedade. En tres laboratorios do centro os/as participantes na visita guiada participarán en tres talleres:

- O corazón do planeta: por medio de experimentos de física e química mariña explicaranse a distribución da temperatura oceánica, o fenómeno das mareas, a medición da salinidade e a problemática da acidificación dos océanos.

- A vida ao microscopio: o taller consiste en ensinar organismos mariños microscópicos mediante estereomicroscopios. As mostras proceden tanto do fondo mariño (organismos bentónicos) como da columna de auga (organismos planctónicos). Do fondo mariño expoñemos animais como diminutos crustáceos, pequenos moluscos ou vermes poliquetos. Nas mostras de plancto podemos atopar pequenos crustáceos, larvas de peixes e outros animais mariños, ou fitoplancto. O módulo compleméntase cunha explicación das redes tróficas mariñas e dos aparellos oceanográficos usados para conseguir as mostras.

- Investigando os peixes: neste taller explícanse os estudos científicos habituais que se fan nas especies de interese comercial co fin de acadar a explotación sustentable destes recursos. Algúns dos conceptos que se tratan son os seguintes: métodos de obtención de datos científicos, investigacións de crecemento dos peixes, anatomía exterior e interior dun peixe, selectividade das artes de pesca ou estudos de marcaxe-recaptura.