Concello da Coruña

Concello da Coruña

Memoria 2020

No ano 2020 alcanzáronse as 1.504 intervencións, o que significa pouco máis do 21% de redución no número de intervencións, debido fundamentalmente aos cambios substanciais que houbo con motivo da pandemia. 

O servizo de bombeiros segue un ano máis coa súa tarefa de servizo público de garantir a seguridade dos cidadáns onde son requiridos, e moito máis nun ano tan especial como foi o 2020, onde a pandemia fixo que tivésemos que cambiar o sistema de traballo para garantir non só a seguridade dos cidadáns, senón tamén a dos membros do servizo.

Quero felicitar especialmente o labor que desempeñaron todos e cada un dos membros do colectivo, xa que redobraron os seus esforzos nas súas tarefas habituais, tendo que dividir o servizo en dous parques, seguindo uns protocolos moi estritos tanto no traballo de parque, como nas intervencións.

Neste ano tan especial as tarefas que o servizo de bombeiros realiza son moi diversas e cada vez máis especializadas, sendo punteiro o noso servizo non só en Galicia senón en España, con unidades como a Prevención, mantendo un aspecto tan importante como a semana da prevención que se realizou EN LIÑA, adaptándose ás novas esixencias que a situación foi obrigando, ou manter a rede de hidrantes da cidade operativa e nun proceso de mellora continua. Traballos estes que non se ven, pero que sen eles, cando cheguen as intervencións, estas veranse mermadas e difíciles de controlar.

Como sempre o grupo de rescate acuático prepárase todo o ano, para estar no menor tempo posible en calquera lugar do noso litoral para axudar a quen o necesite. Tamén co seu labor de prevención nas alertas por temporal, vixiando as nosas costas.

Nesta memoria do ano 2020 alcanzáronse as 1.504 intervencións, o que significa pouco máis do 21% de redución no número de intervencións, debido fundamentalmente ao que comentamos dos cambios substanciais que houbo con motivo da pandemia. Destacando unha baixada nos incendios forestais un 40 % e nos urbanos un 45 %. A pesar de subir os incendios pequenos en vía pública case un 50 %.

Non só é importante o número de intervencións, que dá un reflexo do esforzo dos nosos bombeiros, senón que ademais téntase facer un traballo con calidade, chegando pronto aos sinistros cunha media do 90.54% en menos de 12 minutos desde que se recibe a chamada ata estar no lugar do sinistro. E en menos de 5 minutos no 17.03%.

Tamén é importante o que se tarda en solucionar o problema ao cidadán, e así, en menos de 30 minutos, solucionáronse 409 intervencións, a gran maioría destas todas urxentes, continuando na media dos últimos anos.

Pero se todo o devandito é importante e destaca o seu labor, non menos importante é o labor que realizan en prevención, aínda que neste ano, debido ao confinamento, non se puideron realizar as actividades habituais con escolares pasando de 21 actividades no ano 2019 a tan só 3 no ano 2020. En reténs de seguridade houbo unha redución dun 75%, realizando 43 reténs, de máis de 125 no ano 2019. Tamén nos informes técnicos houbo unha redución dun 41% realizando 49 informes, dos 81 do ano 2019.

O Concello segue apostando por este servizo e así un ano máis superará o millón de euros en investimentos e 400.000 en mantementos e gastos propios do servizo, tendo como obxectivo seguir sendo un dos mellores parques de Galicia, e en cidades da nosa categoría, podemos dicir que de España.

Con estes datos, pódese dicir que o ano 2020, foi un ano especial para o servizo de bombeiros, que se adaptou perfectamente ás circunstancias que nos tocou vivir.

Quero terminar este Saúda, agradecendo o compromiso e vocación de todos os compoñentes do seu persoal. Con isto sei que podo trasladar en nome da cidade da Coruña o noso maior agradecemento ó servizo de bombeiros e o noso total apoio polo labor que realiza.

Juan Ignacio Borrego Vázquez

Concelleiro de Relacións Institucionais, Turismo e Seguridade Cidadá

Que che parece esta sección?

-101-101-101

Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible

Iniciar sesión