O artigo 133 da Lei 39/2015, de 1 de outubro, do procedemento administrativo común das administracións públicas, fai referencia á participación da cidadanía no procedemento de elaboración de normas con rango de lei e regulamentos. No seu apartado primeiro establece: "Con carácter previo á elaboración do proxecto ou anteproxecto de lei ou de regulamento, substanciarase unha consulta pública".

Por conseguinte, a cidadanía poderá achegar as súas suxestións respecto da nova normativa municipal que se prevé aprobar a través deste formulario habilitado na sede electrónica municipal e para iso disporá dun prazo de 1 mes (contado a partir do 16.06.2022 e que finalizará o 15.07.2022, ambos incluídos).

Este proxecto de ordenanza ten por obxecto principal, dentro do marco legal vixente, abordar unha regulación municipal integral do réxime de subvencións e axudas públicas de competencia do Concello da Coruña e dos seus organismos públicos, así como establecer as bases xerais que deben de rexer as correspondentes convocatorias, evitando así a excesiva dispersión normativa naqueles aspectos que na materia deben de ter unha regulación común ou homoxénea.

Esta regulación de carácter xeral deberá de garantir a maior claridade normativa, a simplificación e redución de cargas administrativas, a axilidade e a eficiencia na tramitación das axudas e subvencións municipais. Substituirá, con carácter ordinario, ás ordenanzas municipais reguladoras dos diferentes sectores de actividade, procedéndose á súa derrogación expresa, sen prexuízo daquelas que manteñan a súa vixencia en orde ao seu alcance ou especialización, nas que esta ordenanza terá en todo caso carácter supletorio.

Achégase como anexo a resolución relativa a esta consulta previa, na que se detallan os antecedentes, necesidades a satisfacer e obxectivos, entre outras cuestións, que se perseguen coa aprobación desta nova ordenanza municipal do Concello da Coruña.