DE AQUÍ PARA ALÁ é un proxecto de música infantil no que viaxamos arredor do mundo aprendendo, escoitando, bailando e cantando as músicas de cada lugar facendo partícipe ao público que nos acompañe na procura de novos sons!

O formato do concerto consta dunha posta en escena musical formada por unha instrumentación variada: dende o piano, a batería, o acordeón, os bongoes, campás, ... Contamos con instrumentos típicos de cada lugar polo que iremos pasando coma a kalimba, o didgeridoo, as cunchas... xunto cun variado set de pequena percusión que abrangue dende pandeiretas, pao de choiva... e unha morea de cacharradas que espertarán a curiosidade das nenas e nenos asistentes a este concerto.

Existe o formato completo de concerto didáctico e tamén o formato máis reducido en versión "Canta-contos" sobre este proxecto para bibliotecas, escolas ou espazos reducidos.

A través da música contaremos a historia dunha bolboreta que remata a súa metamorfose co son dos instrumentos musicais. Embarcarémonos nunha viaxe musical arredor do mundo pasando por Brasil, Cuba, Xamaica, os Balcáns, Estados Unidos, Galicia e lugares máxicos por descubrir.

Cantaremos co público o retrouso que nos levará ao seguinte lugar transportando unha mesma melodía por xéneros musicais coma a bossa-nova, o rap, o son cubano, o reggae, o ska...

Unha divertida aventura na que descubriremos paisaxes sonoras distintas desfrutando e aprendendo ao mesmo tempo.

Haberá dous pases, un ás 17 e outro ás 19.00 horas.

Para asisitir ao evento, é necesario que todas as persoas se inscriban, tanto as crianzas como as persoas que as acompañen.

As entradas estarán dispoñíbeis a partir das 10.00 horas do mércores 26 de decembro.