O Servizo de Normalización Lingüística do Concello da Coruña organizou na primeira metade do ano unha boa chea de actividades para todos os públicos.

1. Programa de Fomento da lingua galega nas EIM da cidade

Programa de Fomento da lingua galega nas EIM da cidade  Co fin de contribuír á galeguización de todos os niveis do sistema educativo e á dotación de materiais e recursos ás escolas infantís municipais levamos a cabo a actividade "O son que me arrola", da Asociación Socioeducativa Antonio Gandoy, con 11 actuacións. Unha proposta musical que ofreceu a posibilidade de lles achegar aos/ás máis cativos/as, e ao seu profesorado, a cultura tradicional galega, da man dos cantos de berce e da instrumentación. Un espazo lúdico onde o alumnado puido experimentar e manipular os diferentes instrumentos de percusión: pandeiros, pandeiretas, bombos, tarrañolas... e outros construídos a partir de materiais de refugallo. A actividade constou de dúas partes: a primeira dedicada á escoita, que durou 20 minutos; a segunda parte dedicada á exploración e manipulación dos instrumentos. 

2. Programa Apego 

https://www.coruna.gal/lingua/gl/dinamizacion/apego

Apego é un programa colectivo creado para fomentar e mellorar a transmisión do galego como lingua inicial. Diríxese ao contexto familiar e social dos nenos e nenas nos seus primeiros anos de vida (0 a 6) para achegarlles argumentos e facilitarlles ferramentas e redes que sosteñan e arroupen a crianza en galego. Queremos axudar á socialización en galego e propoñer o uso da lingua galega para crear vínculos coa familia, para asentar o arraigo a esta terra, porque a lingua que mamamos, na que aprendemos a falar, vai ser a base da identidade futura do voso fillo ou da vosa filla. A lingua de cada pobo é un tesouro irrepetible e tamén é a cerna que lle permite existir e descubrir o mundo.

Normalización Lingüística do Concello da Coruña organizou, de marzo a xuño, as seguintes actividades para familias con crianzas de 0 a 6 anos no Centro Ágora:

• "A voar", de Cé Orquestra Pantasma  (3-6 anos), espectáculo baseado no libro-CD do mesmo título, un conto para soñar con música para brincar. Actividade que pretende axudarlles ás nenas e nenos a reivindicaren a confianza necesaria para satisfacer as súas necesidades de liberdade, movemento e xogo libre.

• “Carapuchiña Vermella e os 5 lobiños”, de Ángeles Goás  (0-3 anos), narración oral e música en directo onde a gran protagonista é unha Carapuchiña Vermella que vive unha aventura diferente.

• “Cantacontos para bebés“, de Pablo Díaz  (0-3 anos), viaxe a través dos contos coa música como fío condutor, tratando temas e rutinas adaptadas para as/os máis pequenas/os e axudándose de instrumentos como frautas.

• “Voa, voa!”, de Talía Teatro (auditorio) "Chimpo de ra", de Raquel Queizás  (5-6 anos), espectáculo para divulgar e relembrar a arte de xogar coas palabras. Relación de ditos populares, retrousos, xogos de man que perduraron xeración tras xeración e que se foron transmitindo de xeito oral.

•   “O son que me arrola”, da Asociación Socioeducativa Antonio Gandoy  (6 meses-3 anos), proposta musical que lles achega aos/ás máis cativos/as a cultura tradicional galega, da man dos cantos de berce e da manipulación de instrumentos de percusión.

• "Momento musical para bebés", de Lydia Botana  (0-3 anos), sesión participativa para coñecer instrumentos, sons, contos, movementos ou cancións con xesto. Estímulos sonoros e cancións.

• “Contos debuxados, debuxos contados”, de Caxoto e Marc Taeger  (4-6 anos), actividade na que se xuntan a palabra contada e a ilustración. Personaxes inesquecibles, creatividade desbordada e moito divertimento.

• “Fíos do querer”, de Cé Orquestra Pantasma  (0-3 anos), espectáculo baseado no libro-CD do mesmo título, para xogar e cantar coas crianzas de colo coa axuda de instrumentos tradicionais que se manipulan.

• “Ler para crer”, de Joshua Kenneth  (4-6 anos), espectáculo de ilusionismo participativo onde se trata de animar as familias e as crianzas a descubrir as marabillas e a maxia da lectura mediante a arte do imposible, unha das ferramentas educativas máis potentes.

• “Lingoreteira!”, de Xarope Tulú (auditorio)  (3-6 anos), espectáculo teatral con narración oral, música en directo e manipulación de monicreques. Grazas ás  lingoreteiras chegaron ata hoxe algunhas das historias que se contan. 

• “Contaconto ilustrado e musicado sobre Begoña Caamaño”, de Polo Correo do Vento  (3-6 anos), actividade na que se homenaxea a escritora á que se lle dedica o Día das Letras Galegas 2026. É o momento non de cambiar as regras, senón de cambiar o xogo. De mudar o mundo, da xustiza, da igualdade, da liberdade e tamén da felicidade".

• “Leo e os números“, de Trémola Teatro  (1-3 anos). Leo, o león máis curioso da selva, está aprendendo os números. Ten un barco, dúas cereixas, tres coches... un día desordenáronselle todas... Xa non lembra a orde dos números! Será capaz de ordenar as súas dez cousas favoritas?

• “Foliada con Apego”, de Pablo Díaz e Olga Kirk  (3-6 anos), música e baile tradicional mesturado co xogo baseado nas cancións máis coñecidas por todas e todos (O galo, A vaca marela, O verdegaio...)e acompañado por percusión miúda (axóuxeres, pandeiretas etc.) que traen as familias.

3. Programa Falamos 

• Programa Falamos primaria 2026 . 

  O Servizo de Normalización Lingüística do Concello da Coruña ten establecida, entre as súas funcións, a de realizar diferentes programas de dinamización lingüística para avanzarmos na normalización social do galego, entre os que se atopa o Falamos primaria. Este programa pretende promover a interacción entre a escola e a súa contorna para facer máis rendibles os recursos e os esforzos deses dous ámbitos en prol da normalización do galego, darlle ao alumnado unha visión útil e moderna da lingua galega e eliminar os prexuízos lingüísticos existentes na infancia sobre o galego.

• Con estes obxectivos, desenvolvemos no auditorio do Centro Ágora 2 sesións do espectáculo musical e teatral "A feira das linguas", de Lydia Botana, dirixidas ao alumnado de primaria (4.º, 5º ou 6.º curso) dos CEIP da cidade, o mércores 8 de abril, unha ás 10.00 h e outra ás 12.00 h. Esta actividade é un percorrido pola historia da lingua galega, a través da música e en clave de humor, xunto a diversas reivindicacións, moitas risas e emocións.

4. A Coruña das Letras 

• A Coruña das Letras: andainas guiadas por Xurxo Souto pola Coruña máis descoñecida . Historia da cidade, literatura, toponimia tradicional da cidade e a importancia da lingua nos seus diferentes contextos. Para maiores de 16 anos. 3 camiñadas pola cidade, en concreto pola contorna da Torre de Hércules, o Ensanche e Monte Alto. 

5. AgoraSón  

• Ialma no AgoraSón da primavera 2026  en concerto para público adulto, co gallo do Día das Letras Galegas e para promover a lectura en lingua galega e o préstamo de material audiovisual, a través das bibliotecas municipais.