A Asociación Galega do Profesorado de Educación Matemática (AGAPEMA), organiza unha nova edición do Rebumbio Matemático, un concurso, dirixido ao alumnado de 6º de primaria, que busca fomentar o espírito cooperativo e de traballo en grupo a través das matemáticas.

Unha vez concluída a fase de centro, que se celebrará de forma interna, en cada un dos centros participantes, do 1 ao 30 de marzo, celebraranse as fases de zona na Coruña, Ferrol, Lugo, Ourense, Pontevedra, Santiago e Vigo. A fase da zona da Coruña celebrarase o venres 24 de abril, a partir das 10:30 horas, no Fórum Metropolitano.

A proba, que será a mesma e simultánea para todas as zonas, consistirá na resolución de CINCO problemas por parte dos tres membros de cada equipo traballando conxuntamente, de maneira cooperativa. Non se trata de repartir os problemas entre os tres participantes, senón de traballar entre os tres cada un dos problemas. Na valoración das respostas primará o método de resolución empregado, a súa orixinalidade, as estratexias utilizadas, os procedementos de representación, a expresión escrita do proceso seguido, o emprego correcto de unidades, etc., por encima da mera solución.

Máis información na web de AGAPEMA (https://agapema.org/actividades/rebumbio-matematico/) e na páxina do programa ( Rebumbio matemático 2025-26 ).