Polo menos desde finais do s. XV a Torre de Hércules converteuse na imaxe da Coruña, ao tomala o Concello como tema para o seu escudo. A partir de entón, cidade e Torre foron unha mesma realidade. As primeiras representacións coñecidas, aproximadamente do ano 1448, son moi concisas, pero ao longo do s. XVI formulouse a estrutura do escudo, de maneira que a partir de mediados do cincocentos todos os elementos clave da lenda de Hércules estiveron presentes.

Unha destas imaxes aparece nun documento oficial do emperador Carlos V, coñecido como a Executoria de 1552, xunto ás Columnas de Hércules. Nela represéntase o faro sobre un promontorio e dominando un amplo sector da costa. Baixo os cimentos da construción está soterrada a cabeza coroada de Xerión que se dispón ladeada, como basamento da propia Torre. No remate aparece tanto a referencia ao candil que colocou Espán, o lendario sobriño de Hércules que rematou a construción do faro, como ao espello que permitía descubrir a gran distancia as naves inimigas, tamén atribuído a Espán. Ao redor do faro aparecen as sete cunchas de vieira que simbolizan as sete provincias do Reino de Galicia e, nalgúns casos, sobre a Torre represéntase o copón como unha das armas do Reino.

Unha variante desta imaxe atopámola nun escudo datado entre os s. XVI e XVII, conservado no Museo Arqueolóxico do castelo de San Antón. Esta representación, con mínimas variantes, aparece tamén nos escudos do s. XVII que se atopan no concello e na muralla do xardín de San Carlos. En ambos os casos represéntase a Torre co seu candil, pero a cabeza ladeada de Xerión substituíuse, nesta última, por unha caveira coroada que se dispón dereita, baixo a base da Torre.