No marco da programación do Ano Internacional María Casares nas Bibliotecas Municipais da Coruña, terá lugar na sala de adultos da Biblioteca Ágora unha charla divulgativa sobre a actriz coruñesa María Casares (A Coruña, 1922 - Alloue, Francia, 1996) a cargo da escritora e crítica teatral Inma López Silva.

Achegarémonos á figura desta gran muller, actriz destacada e personaxe pública cunha vida marcada pola súa infancia coruñesa, por se exiliada e por ser filla de Santiago Casares Quiroga e Gloria Pérez Corrales. Unha muller referente na vida social, cultural e artística da Francia do século XX, que levou sempre con orgullo e dignidade o feito de ser muller galega. Unha referente das vangardas artísticas e un exemplo de compromiso ético, político e social coa súa orixe, coas persoas refuxiadas e cos ideais da república.

Escoita no perfil en Ivoox das BMC "Lemos para ti: "Memorias de cidades sen luz" un pequeno fragmento desta novela histórica de Inma López Silva na que se fai referencia á figura de María Casares.

Sobre Inma López Silva

Inma López Silva (Santiago de Compostela, 1978) é unha das novas narradoras galegas máis destacadas do panorama actual. A súa novela "Neve en abril" gañou o Premio Rúa Nova en 1996. Seguiron os relatos de "Rosas, corvos e cancións". Con "Concubinas" obtivo o Premio Xerais 2002. No 2007 publicou "New York, New York", diario dunha estadía na cidade norteamericana, que despois foi traducido ao castelán.

Ademais de escritora, destaca como crítica e investigadora teatral, colaboradora habitual en numerosas publicacións periódicas e científicas. Actualmente é profesora na Escola Superior de Arte Dramática de Vigo.

Coa novela "Memoria de cidades sen luz", publicada por Galaxia, obtivo o Premio Blanco Amor 2007. Posteriormente foi recoñecida co premio AELG como mellor obra de narrativa 2008 e o Arcebispo San Clemente como mellor novela en galego 2008. En 2016 recibiu o Premio Insua dos Poetas como recoñecemento aos seus 20 anos de carreira literaria. A súa última novela, "O libro da filla" (Galaxia, 2020) foi galardoada co Premio da Asociación de Críticos Literarios.