A cuarta edición do programa municipal Cinema na Escola celebra a súa gala final, para a categoría de ESO, o mércores 20 de maio, a partir das 17:00 horas, no Centro Sociocultural Ágora.

Na gala, que contará coa presenza do Concelleiro de Educación, Formación e Innovación Tecnolóxica, Juan Ignacio Borrego, serán proxectados fragmentos dos curtos finalistas, desvelados os grupos gañadores e, finalmente, entregados os premios correspondentes (mellor curtametraxe, interpretación, guion, fotografía, efectos visuais, edición e montaxe, e edición de audio).

Como en edicións anteriores do programa, o público poderá votar ao que considera a mellor curtametraxe de cada unha das categorías (Primaria e ESO). Para iso, xa se poden visualizar os 18 curtos presentados nesta edición (9 de Educación primaria e 9 de ESO) na canle de YouTube de Educación do Concello da Coruña.

Para determinar os curtos gañadores do premio do público na categoría de ESO, teranse en conta as estatísticas de reproducións, likes e retencións entre o xoves 14 de maio ás 12:00 horas e o mércores 20 de maio ás 12:00 horas.

Grupos participantes na categoría de ESO

• IES Agra do Orzán, co curto "Ou móbil".
• IES Elviña, co curto "Foliada eclipsada".
• IES Eusebio da Guarda, co curto "Fogar".
• IES Rafael Puga Ramón, co curto "Micelio".
• IES Rafael Dieste, co curto "Log out".
• IES Ramón Menéndez Pidal, co curto "Descoñecidos".
• IES Salvador de Madariaga, co curto "O recado".
• CPR Franciscanas, co curto "Soliloquio".
• CPR Franciscanos, co curto "Cookies".