A Agrupación Folklórica Aturuxo, con máis de 60 anos de andaina no mundo do folclore, e pola que pasaron personalidades do mundo da cultura en xeral como Sebastían Martínez-Risco Macías, Francisco ValesVillamarín, Antón Naveyra Goday ou José Luís López Mosteiro; e especificamente do folclore galego como Adolfo Anta Seoane, María Vitoria Canedo, Juanjo Liñares, Edilberto Suárez Pedreira, Manolo Cajaraville ou as arquicoñecidas 'velliñas de Mens', vai render homenaxe ao que foi o seu último presidente (ata o pasado febreiro), JOSÉ LUÍS GARCÍA GARCÍA, cun festival folclórico no CENTRO ÁGORA.

José Luís García entrou na directiva de Aturuxo en agosto de 1976 e, polo tanto, permaneceu na agrupación case 40 anos, a maior parte deles como vicepresidente, na directiva que presidiu José Trillo Fernández-Abelenda, a quen sucedeu como presidente ao cesar este a finais de 2012.
Home traballador e cordial, fixo un labor tremendamente efectivo, en prol dos intereses de ATURUXO, sendo o artífice, entre outras moitas cousas, das novas instalacións da agrupación na avenida de Hércules e da réplica do mural que José Luís Rodríguez pintara no antigo local da agrupación (praza de María Pita, 1, baixo) que Aturuxo ocupou ata febreiro de 2006.
En recoñecemento a tantos anos ao servizo da asociación e por todo o labor desenvolvido, ATURUXO réndelle unha merecida homenaxe, cun festival folclórico no que participará tamén, como colaborador invitado, o Coro Galego de Santa Comba de Veigue.