O programa educativo Gargallada. Novas xeracións na comedia 2025-26 , que busca dinamizar o uso da lingua galega a través do humor, o formato monólogo e a expresión oral, en colaboración con humoristas profesionais, celebra a súa gala final o vindeiro xoves 7 de maio, ás 17:00 horas no auditorio do Centro sociocultural Ágora.

Tras as etapas de formación inicial (novembro-decembro), formación do proceso creativo (xaneiro) e formación de posta en escena (febreiro), a presentación dos monólogos, que han de ser en galego e ter unha duración de entre 3 e 5 minutos, levará a cabo nunha gala final na que un xurado cualificado elixirá aos/as monologuistas gañadores/as nas distintas categorías (alumnado de 1º-2º de ESO, alumnado de 3º-4º de ESO e FP básica e alumnado de bacharelato e grao medio de FP).

En total, 14 estudantes (7 de 1º e 2º de ESO, 4 de 3º e 4º de ESO e 3 de bacharelato) de 10 centros educativos do Concello da Coruña subirán ao escenario para presentar os seus monólogos, froito dun intenso proceso de aprendizaxe guiada por profesionais do humor entre 30 grupos de 752 alumnos/as.

Haberá un gañador/a por categoría, que recibirá un premio consistente en 150€. O xurado poderá propoñer outras mencións especiais, sen prestación económica, e no seu fallo poderá deixar deserto algún premio.