Cunha atmosfera máxica e unha posta en escena futurista, Inventio recupera a paisaxe, os costumes, a música, a arte ou a arquitectura de Galicia nun espectáculo delicado e cegador, cun ritmo vertixinoso, nunha gran produción con ecos do cinema futurista de Stanley Kubrick, Ridley Scott ou Denis Villeneuve.

A historia

2094. Galicia. Último ano Xacobeo deste século XXI. Unha troupe formada por un ilusionista, seis bailaríns e sete artistas de circo comproban que xa non existe o Camiño de Santiago, xa ninguén o lembra. Non quedan peregrinos nin un camiño que percorrer xuntos. Tampouco a auga ou a choiva, o son das gaitas, o verde dos campos ou a pegada do mar na area. Nin un só rastro, nin un só recordo.

Que foi de todo aquilo? Onde quedaron a viaxe, a procura e o descubrimento? A onde foi parar a sensibilidade? Son as preguntas que guiarán esa troupe circense, empeñada nunha misión: reconstruír a súa identidade cultural. Sobre as táboas, as/os artistas vense envoltos nunha aventura sen igual. O pasado tócalles maxicamente e unha forza sobrenatural transformaraos.

VENDA DE LOCALIDADES

• Venda en liña: Ataquilla.com
• Venda no despacho de billetes central da praza de Ourense: de luns a venres das 11.00 ás 15.00 h e das 16.30 ás 19.30 h (excepto festivos)
• Venda no despacho de billetes do Teatro Colón unicamente os días do espectáculo desde dúas horas antes (sempre que queden localidades dispoñibles)