A mostra A fronteira infinita. Os artistas galegos e a emigración nas coleccións Afundación e ABANCA, realizada a partir dos ricos fondos das coleccións ABANCA e Afundación, achégannos a arte realizada por creadores galegos fóra de Galicia, en América e Europa, ao longo de boa parte do século XX.

É preciso lembrar que a historia de Galicia está inevitablemente vinculada ao feito migratorio, xa que a saída de galegos cara ao estranxeiro é unha constante desde finais do século XIX, momento en que se agudiza o éxodo migratorio, que continuará ao longo do século XX. Neste contexto o exilio motivado pola guerra civil adquire unha relevancia especial polas connotacións políticas do feito e pola magnitude sociocultural que vai ter, debido ás consecuencias inmediatas que produce na cultura galega por mor da saída de personalidades das artes e das letras que teñen que vivir fóra do país durante un longo período.

O contido da mostra quere incidir na riqueza cultural do fenómeno migratorio atendendo a tres núcleos: o primeiro, a presenza da emigración na obra de Castelao como tema social e cultural na Galicia das primeiras décadas do século XX; o segundo, o constituído polos artistas exiliados en América tras a guerra civil; e o terceiro núcleo inclúe as novas xeracións formadas na posguerra que protagonizan unha nova diáspora, esta vez dirixida cara ao centro do sistema cultural dominante, Madrid.

Coas obras seleccionadas destácase a importante modificación que a diáspora ten como factor decisivo na evolución da arte de todos eles.