O venres 28 de novembro a Domus acolle unha sesión especial de cinema científico, coa proxección da película 2012, que será presentada e comentada pola paleontóloga Penélope Cruzado-Caballero. Ao finalizar a proxección, abrirase un coloquio dedicado ao cambio climático e aos eventos de extinción masiva, no que o público poderá dialogar directamente coa especialista.

A xornada do sábado 29 de novembro estará dedicada ao público infantil. Ás 11:30 horas proxectarase a película de animación Ice Age 2: el deshielo, unha proposta pensada para público infantil e familiar que permitirá introducir os conceptos de clima, evolución e adaptación de especies dun modo entretido.

Paralelamente, entre as 12:00 e as 14:00 horas, celebraranse diversos talleres infantís de paleontoloxía coordinados pola asociación UDC Big Bang e por alumnado da Facultade de Ciencias da UDC, nos que nenos e nenas poderán manipular fósiles, reconstruír paisaxes prehistóricas e aprender xogando.

Esta actividade está enmarcada no programa da II Semana da Paleontoloxía, que se celebra na Coruña entre o 26 e 29 de novembro, organizado polo Centro Interdisciplinar de Química e Bioloxía (CICA) e o Instituto Universitario de Xeoloxía (IUX) da Universidade da Coruña.

A II Semana da Paleontoloxía ofrece un programa de actividades que combina investigación, divulgación e cultura científica para achegar a paleontoloxía á sociedade.