A nova edición do festival "A fonética dos corpos", que conforma o programa Agra no Ágora, tráenos ao barrio da Agra este espectáculo de Producións Teatrais Excéntricas que, segundo algúns dos máis esixentes críticos, é un dos espectáculos máis fermosos dos que podemos gozar na escena galega. Tres dos mellores narradores da escena internacional xuntos falando das súas musas, as súas vellas. Cada función é diferente, única; algunhas vellas repiten, outras non, aparecen e desaparecen da memoria colectiva na maior e máis antiga expresión teatral: a narración oral. O espectáculo da palabra viva, ou mellor, resucitada nas falas de Celso Sanmartín, José Luis Gutiérrez e Quico Cadaval xirou por toda Galiza con esporádicas saídas a Portugal, Castela e León e Cataluña. A materia dos relatos que se presentaban no que parecía unha verdadeira sesión de espiritismo era a vida cotiá, os traballos e os días, os labores, os namoros, e as tristuras, as dores e os divertimentos. A prodixiosa biblioteca do mundo analfabeto na súa infinita riqueza.

Dende 2023 TRES VELLAS NA ROMARÍA procura nas memorias das devanceiras os días gloriosos de romarías e festas, os bailes, os milagres, as devocións, os exorcismos, as empanadas e os melindres, o viño novo e a caña brava... AS TRES VELLAS saen cos seus máis fermosos panos rameados para ir bailar as muiñeiras, xotas e bailes charros nos terreiros das festas. O repertorio componse de todo o que rodea o mundo estival das romarías: milagres, romances, ofrendas devotas, relatos humorísticos, un mundo no que se mestura a superstición e o festeiro escepticismo. Unha viaxe equidistante aos tempos de "Deus é bo, mais o Demo non é mao". Un repertorio no que se xuntan os xeonllos esfolados das procesións cos pés encalecidos dos bailes. Parece un mundo esquecido, mais AS TRES VELLAS regresan para contalo coa mesma frescura que se fose onte.

Ficha artística e técnica

· Celso Fernández Sanmartín é narrador oral e recoñecido poeta. O seu libro A cama do meu avó é un dos seus últimos sucesos, convertido na función "Escenas do cambio".

· Guti é narrador, guía nativo e influenciador. Publicou o libro Cuaderno de últimas voces e mantén unha entrada diaria en Facebook titulada "Besos matinales".

· Quico Cadaval conta contos e dirixe teatro. Dirixiu "O porco de pé" e participa no último proxecto do CDG "Shakespeare en Roma".

Este festival, como todas as actividades do programa Agra no Ágora son de acceso libre, de balde e non se precisa reserva previa. O programa está financiado polo Concello da Coruña e deseñado en colaboración coa Asociación veciñal Agra.