O concelleiro de Deportes, Manuel Vázquez, participou esta mañá na presentación da cuarta edición da carreira 10K Costa Ártabra, unha cita xa consolidada no calendario deportivo galego que se celebrará o vindeiro domingo 19 de abril.

A proba volverá conectar os castelos de Santa Cruz, en Oleiros, e San Antón, na Coruña, a través dun percorrido de dez quilómetros a nivel do mar, integramente polo litoral, con saída ás 9.30 horas desde a rúa Carlos Manuel de Cépedes e meta situada no Parrote.

As inscricións continúan abertas a través da plataforma Carreiras Galegas e a día de hoxe son xa preto de 1.500 as persoas anotadas para participar nesta carreira, que mantén o seu carácter solidario. Os fondos recadados destinaranse á Asociación CASCO para apoiar o seu programa de deporte inclusivo e contribuír á unidade de VIH do CHUAC.

Durante a presentación púxose en valor o papel deste tipo de iniciativas na promoción de hábitos saudables e na construción dunha cidade máis inclusiva, en liña co compromiso do Goberno de Inés Rey co deporte como ferramenta de cohesión social.

A organización disporá de servizos de transporte para os participantes, gardaría, avituallamento e asistencia médica, ademais de ofrecer facilidades para familias numerosas e persoas con discapacidade. Tamén se habilitou a opción de dorsal solidario para aquelas persoas que desexen colaborar coa causa sen participar na proba.

A carreira, organizada polo Comité Cidadán Antisida da Coruña (CASCO) e BOXFIT, renderá nesta edición homenaxe ao atleta olímpico coruñés Andrés Díaz, en recoñecemento á súa traxectoria deportiva internacional.