O Festival Primaletras continúa coas actividades en conmemoración do Día do Libro, que comezaron o pasado venres 22 co Batallón literario de Nelson Quinteiro polas rúas da cidade. Con motivo do Día do Libro, o Festival Primaletras ten previstos dous encontros literarios abertos á cidadanía en colaboración cos Clubs de Lectura "Café con Libros" das Bibliotecas Municipais. O primeiro deles celebrarase mañá, martes 26 de abril ás 18.30 h na biblioteca dos Rosales, onde a escritora coruñesa Bibiana Candia terá unha charla aberta para falar da súa experiencia profesional no mundo literario.

A escritora, con formación e traxectoria xornalística, foi galardoada o pasado ano 2021 co Premio de Xornalismo Julio Camba polo seu artigo «Una legión de señoras en bata», un homenaxe ás nais e avoas cuxo labor permaneceu invisibilizado durante moitos anos. Candia ten, ademais, dous poemarios publicados: "La rueda del hámster" e "Las trapecistas no tenemos novio", un libro de relatos chamado "El pie de Kafka" e o volume "Fe de erratas", un relato metaliterario no que a personaxe principal atópase engaiolada no manuscrito dun escritor. Ademais, Bibiana Candia é colaboradora habitual de medios dixitais como Jot Down ou The Objetive, onde publica artigos de opinión como o galardoado co premio Julio Camba.

A súa primeira novela "Azucre" (2021) escolleuse como unha das obras de lectura do club "Café con Libros" polo que a charla xirará arredor da novela, para compartir e coñecer opinións sobre ela,  así como do proceso creativo da súa escrita. A entrada á charla é de balde e aberta eta completar capacidade. Toda a información pode consultarse na seguinte ligazón.

Encontro literario con Xesús Fraga no Ágora 

O segundo dos encontros literarios será co escritor Xesús Fraga, acto central da Celebración do Día do Libro. O escritor foi galardoado o pasado ano 2021 co Premio Nacional de Narrativa pola súa obra "Virtudes (e misterios)", lida polos clubs de lectura da rede de Bibliotecas Municipais.

O escritor é licenciado en Xornalismo pola Universidade Pontificia de Salamanca e desenvolveu a súa carreira como redactor de La Voz de Galicia desde o ano 1997. No eido literario, cultivou diversos xéneros, desde a narrativa infantil e xuvenil ata narrativa para adultos, sendo recoñecido con importantes galardóns como o Premio Raíña Lupa de Literatura Xuvenil no ano 2013 por "Reo" ou co xa citado Premio Nacional de Narrativa o pasado ano 2021. "Virtudes (e misterios)" (2021), tamén galardoada co Premio da Crítica de Galicia, será o eixe principal do acto organizado no marco do Festival Primaletras, onde falará do proceso de escritura da súa obra e tamén sobre a súa experiencia profesional como escritor. Xesús Fraga estará acompañado da escritora Antía Yañez e Luisa Lis, bibliotecaria do Fórum, así como de Lorena Gómez que moderará o as intervencións dos tres relatores.

O acto celebrarase na biblioteca do centro sociocultural do Ágora o vindeiro mércores 4 de abril, ás 18.30 h. A entrada será de balde ata completar capacidade. Pode consultarse máis información na web das Bibliotecas Municipais ou no programa do Primaletras, dispoñible na seguinte ligazón.