O concelleiro de Cultura e Turismo, Gonzalo Castro, presentou esta mañá a actuación de Los Satélites do vindeiro 12 de agosto en María Pita, enmarcada dentro da programación A Coruña CidadEclipse e das Festas de María Pita. Xunto ao edil tamén participaron no acto Javier Saavedra, director musical da orquestra, e os artistas José Manuel Rodríguez (Noly) e Paco Lodeiro.

"Será unha actuación cun forte carácter simbólico e un tributo moi merecido a toda a tradición musical coruñesa e galega que representan Los Satélites", indicou Castro. O concerto celebrarase na praza de María Pita, onde xa actuou a formación o pasado mes de agosto, nunha homenaxe a Sito Sedes. Desta volta, ademais de integrarse na programación da eclipse de Sol do Concello, tamén será unha homenaxe a outra das figuras fundamentais da formación: o lendario cantante coruñés Pucho Boedo, que falecía hai 40 anos.

Os presentes destacaron a importancia de Los Satélites na tradición musical galega, sendo na actualidade a única orquestra do Estado que conserva corpo de metais na súa formación. O repertorio do 12 de agosto estará moi ligado á verbena galega e a súa tradición, ademais de incluír as mellores cancións interpretadas por Pucho Boedo, ao que poñerán voz cantantes masculinos e femininas da formación e invitados como Paco Lodeiro.

"O Goberno de Inés Rey ten moi presente a importancia de Los Satélites na cultura musical da cidade e nos últimos anos estamos a colaborar con eles en diferentes eventos de moita importancia para a cidadanía", indicou Castro.