O concelleiro de Urbanismo, Rehabilitación e Vivenda, Francisco Díaz Gallego, presentou esta mañá a programación das actividades previstas pola Semana da Arquitectura 2023, que conmemorará os 50 anos de existencia da Escola Técnica Superior de Arquitectura (ETSAC) situada no campus universitario da Zapateira.

A iniciativa, promovida de forma conxunta entre o Concello, o Colexio Oficial de Arquitectos de Galicia (COAG) e a Universidade da Coruña (UDC), terá lugar entre os días 29 de setembro e 8 de outubro. Nesta edición, o abano de propostas inclúe diversas mostras gráficas, así como xornadas e percorridos guiados de carácter divulgativo.

Ademais, e co obxectivo de achegar a cidadanía a iniciativas de remodelación xa executadas polo Goberno de Inés Rey, organizaranse visitas guiadas en espazos, instalacións e inmobles destinados a usos públicos. É o caso do mercado municipal de Durmideiras, xa aberto desde o anterior mandato tras a súa rehabilitación integral.

"A Semana da Arquitectura 2023 pon o foco especialmente na ETSAC pola efeméride histórica que supón a conmemoración do seu medio século de vida, cumprindo unha aspiración da cidade que se remontaba á década dos sesenta", subliñou Francisco Díaz Gallego, que convidou as veciñas e veciños da Coruña a asistir ás múltiples actividades que terán lugar na propia sede da ETSAC, a delegación do COAG na Coruña, a Fundación Luís Seoane e a sala municipal de exposicións de Durán Loriga, entre máis localizacións.

No acto de presentación da Semana da Arquitectura 2023, celebrado esta mañá no Palacio Municipal de María Pita, Díaz Gallego estivo acompañado pola presidenta e o secretario da delegación do COAG na Coruña, Ruth Varela e Emilio Rodríguez, así como polo director e o subdirector de Infraestruturas na ETSAC, Plácido Lizancos e Carlos Quintáns.

Apertura da mostra sobre a obra arquitectónica de Antonio Tenreiro

Tamén este martes, ás 19.30 horas, o Salón de Exposicións do Palacio Municipal de María Pita acollerá o acto de apertura da mostra 'Antonio Tenreiro Brochón. Obra arquitectónica e pictórica reunidas', unha inauguración que tamén contará coa asistencia do concelleiro Francisco Díaz Gallego.

A exposición, que rende tributo ao arquitecto e pintor coruñés co gallo do centenario do seu nacemento, viaxa pola vida e obra de Tenreiro Brochón, que vislumbrou a construción como unha vía para interconectar a arquitectura, a pintura e a escultura. O seu traballo é recoñecido case que de forma popular polo deseño da fonte das Paxariñas, no barrio de Elviña, mais o seu selo tamén pervive a día de hoxe en numerosos locais comerciais da cidade, así como nos murais da Casa Enrique, da rúa Compostela.

SEMANA DA ARQUITECTURA 2023

A programación completa da Semana da Arquitectura 2023, na que todas as actividades serán abertas á cidadanía, é a seguinte:

VENRES 29 DE SETEMBRO

• 19.30 horas (Delegación do COAG): Inauguración da mostra 'Las ciudades y sus tesis'.

SÁBADO 30 DE SETEMBRO

• Desde as 10.00 ás 18.00 horas (ETSAC): Xornadas divulgativas 'Las ciudades y sus tesis'.

LUNS 2 DE OUTUBRO (Día Internacional da Arquitectura)

• 19.30 horas (Fundación Luís Seoane): Inauguración da mostra '50 imágenes y algunos planos', así como unha liña de tempo no patio da Fundación.

MARTES 3 DE OUTUBRO

• 19.30 horas (Sala municipal de exposicións de Durán Loriga): Inauguración da mostra 'Algo de nós'.

MÉRCORES 4 DE OUTUBRO

• Desde as 12.00 horas: Visita guiada ás instalacións da ETSAC.
• Desde as 13.00 horas (ETSAC): Conferencia de Fernando Blanco.
  • Proxección de vídeos do mestrado da ETSAC.
  • Exposición de 'Maquetas'.
  • Exposición de Le Corbusier.
  • Exposición 'Liñas de traballo'.
  • Presentación do xornal polos 50 anos da ETSAC.
• Desde as 17.00 horas: Visita ao mercado municipal de Durmideiras, co equipo de profesionais de OLA Estudio.
• Desde as 17.30 horas: Visita guiada ás instalacións da ETSAC.
• Desde as 18.30 horas (ETSAC): Taller divulgativo sobre os vindeiros 50 anos da ETSAC.

XOVES 5 DE OUTUBRO

• Desde as 17.00 horas: Visita guiada ao edificio do Banco Pastor, con Pablo Castro de la Iglesia.
• Desde as 18.30 horas (ETSAC): Taller divulgativo sobre os vindeiros 50 anos da ETSAC.

SÁBADO 7 DE OUTUBRO

• Desde as 12.00 horas: Roteiro divulgativo 'Descenso urbanístico desde a ETSAC ó centro da Coruña', con punto de encontro na ETSAC.
• Desde as 17.00 horas: Roteiro divulgativo 'A cidade da República', con punto de encontro no Campo de Artillería.

DOMINGO 8 DE OUTUBRO

• Desde as 12.00 horas: Roteiro divulgativo 'A Coruña histórica', con punto de encontro no acceso ao Xardín de San Carlos.

No caso das visitas guiadas ao mercado municipal de Durmideiras, ás instalacións da ETSAC e ao edificio do Banco Pastor será preciso tramitar a inscrición remitindo a solicitude ao enderezo electrónico semanadaarquitectura2023@coruna.gal. 

As demais actividades da programación serán de acceso libre.