A V Residencia Cidade da Coruña abriu o prazo de envío de solicitudes para a súa nova edición. Ata o 17 de febreiro ás 22.00 horas, os autores e autoras interesados de calquera parte do territorio español poderán remitir as súas propostas ao correo electrónico 1863coruna@gmail.com. Na súa candidatura deberán incluír: unha biobibliografía co seu número de DNI e datos de contacto; unha memoria dun máximo de dúas páxinas describindo o proxecto literario que se pensa desenvolver e achegando detalles sobre o plan de execución; un dossier literario dun máximo de 10 páxinas que sirva como mostra do traballo do autor ou autora e unha carta de motivación dunha páxina. O correo deberá enviarse co asunto "V Residencia Cidade da Coruña".

Os candidatos poderán ser residentes de calquera punto da xeografía española excepto de Galicia e deben ter publicada polo menos unha obra en calquera das linguas do país. Durante a súa estancia, que é improrrogable e desenvolverase ao longo do mes de maio do 2026, terá cubertos gastos de manutención e transporte, e aloxarase nunha vivenda totalmente equipada e pensada para potenciar a concentración nunha contorna creativa. Ademais, o beneficiario terá entrada prioritaria a eventos culturais na cidade, como concertos, museos, bibliotecas, encontros literarios ou obras de teatro.

O xurado encargado da selección, que está integrado por persoas de recoñecido prestixio no ámbito literario, elixirá tamén un o unha suplente que gozaría da residencia no caso de que o titular non puidese trasladarse nas datas marcadas. 

"Este proxecto, financiado polo Concello, ten como obxectivo atraer a creadores, consolidados ou emerxentes, a unha cidade cunha vida cultural vibrante que ten moito que ofrecer e que foi inspiración de non poucos grandes títulos das literaturas galega e española. No goberno de Inés Rey hai unha preocupación real por manter A Coruña no lugar que por dereito e historia lle pertence dentro da escena artística", apuntou Gonzalo Castro, concelleiro de Cultura e Turismo.