Hoxe realizouse nos xardíns de Méndez Núñez o mercado de cooperativas infantís do Proxecto Semente, que contou na edición deste ano coa participación de 422 nenos e nenas pertencentes aos centros CEIP Anxo da Garda, CEIP Manuel Murguía, CPR Hijas de Jesús, CPR Sagrado Corazón, CEIP Eusebio da Guarda, CPR Montegrande, CEIP Rosalía de Castro e o CEIP Zalaeta.

O concelleiro de Educación, Formación e Innovación Tecnolóxica, Juan Ignacio Borrego, visitou os postos ao comezo do mercado para lles desexar sorte aos nenos e nenas participantes, que puideron vender os seus produtos despois de que a alcaldesa Inés Rey, lles concedese as licenzas ás 19 cooperativas nun acto o mes pasado en María Pita. "É moi emocionante ver o esforzo que puxeron nesta iniciativa todos os emprendedores e emprendedoras. Aprenderon o valor do traballo en equipo e do gratificante que é sacar adiante ideas propias con dedicación e paixón", apuntou Borrego.