Mañá martes, 25 de marzo, a partir das 18.30 horas, o Centro Cívico de Mesoiro acollerá un novo encontro participativo no marco do proceso participativo impulsado polo Goberno de Inés Rey para deseñar, de forma colectiva, o futuro servizo de autobús urbano da cidade. A sesión contará coa participación da alcaldesa xunto con parte do Goberno local para escoitar e dar resposta ás diferentes suxerencias e peticións do transporte. Polo momento, o encontro conta con medio cento de persoas inscritas a través do formulario habilitado na web www.coruna.gal/participabus, aberto á asistencia de veciñas e veciños.

O foro incluirá unha breve presentación a cargo do equipo técnico responsable do Estudo do Transporte Urbano, quen explicará os obxectivos, a metodoloxía e o contexto do estudo para o que será o novo contrato de transporte público. Posteriormente, desenvolverase unha dinámica participativa na que as persoas asistentes poderán compartir propostas, suxestións e valoracións sobre distintos aspectos do servizo actual: liñas, frecuencias, accesibilidade, conexións intermodais ou adaptación a novas necesidades da cidade. A información recollida servirá de base para o deseño dun modelo de mobilidade máis eficaz, sostible e centrado nas persoas.

Próximos encontros

O encontro forma parte dun calendario de once sesións nos distintos distritos da cidade, co obxectivo de recoller unha ampla representación das voces da Coruña. 

• 8 de abril: Centro Cívico dos Mallos
• 24 de abril: Centro Cívico de Monte Alto
• 6 de maio: Centro Cívico de Monelos
• 20 de maio: Centro Cívico do Birloque
• 19 de maio: Centro Cívico dos Rosales
• 5 de xuño: Fórum Metropolitano
• 10 de xuño: Centro Cívico de Eirís
• 12 de xuño: Centro Cívico de Elviña
• 14 de xuño: Circo de Artesáns