A alcaldesa, Inés Rey, acompañada por representantes do Goberno municipal así como doutros membros da corporación, recibiu hoxe en María Pita aos xogadores e o equipo técnico do Hockey Club Liceo, que onte conquistou en Barcelona a súa 11ª Copa do Rei vencendo na final ao Calafell La Menorquina por 4-1 cun triplete de Bruno Saavedra. 

"O Liceo non é só un equipo. É historia viva da Coruña. É un símbolo que leva o nome da nosa cidade por toda España e por toda Europa. Xeracións de coruñeses e coruñesas creceron celebrando os vosos éxitos, aprendendo do voso esforzo e sentindo como propias as vosas vitorias", dixo Rey na recepción, na que tamén fixo entrega ao equipo dunha Torre de Hércules de Sargadelos.

A alcaldesa tivo palabras de agarimo para o xogador César Carballeira, que encara a súa última tempada no equipo, para o capitán, Dava Torres, e para o adestrador, Juan Copa, entre outros integrantes do club, tanto xogadores como persoal técnico, ao que tamén citou.

O Liceo conquistou 44 títulos nacionais e internacionais nos últimos 44 años, incluído 8 Ligas, 11 Copas do Rei, 3 Supercopas de España, 6 Copas de Europa, 3 Copa CERS, 2 Recopas de Europa, 6 Supercopas de Europa e 5 Copas Intercontinentais, e é o club de hockey máis laureado da historia de Galicia. Ademáis, é actualmente líder en solitario da OK Liga a falta de 4 xornadas para o final da tempada.