As festas populares proseguiran mañá no barrio de Labañou e San Roque, tomando desa maneira o relevo da Gaiteira e do Castrillón, que celebraron por todo o alto os seus festexos, promovidos polo Concello en colaboración coas asociacións veciñais.

Esta semana que remata foron A Gaiteira, o pasado luns, e o Castrillón-Urbanización Soto os barrios que acolleron as tradicionais festas, con actividades para os máis novos e con verbenas e concertos.

Mañá sábado será a quenda de Labañou e San Roque, que celebrarán ao grande o centenario do club do barrio, o Sin Querer. Para iso organizouse na praza da Tolerancia o circo de Isla de Triska, a partir das 19.30 horas, ao que seguirán as actuacións de Belén Tajes, ás 20.30 horas; Sin Querer Centenario Band, ás 22.00 horas; e The Teta's Van, a partir das 23.40 horas. Durante estes actos darase a coñecer o himno oficial do centenario do Sin Querer, composto por Paco Lodeiro e Miguelón Ladrón de Guevara.

As festas e verbenas nos barrios rematarán a próxima semana. Así, o día 23 terá lugar a tradicional Festa da Fresa en Eirís, con actividades durante toda a tarde no parque de Eirís; O programa comezará con actividades infantís desde as 16.30 horas, coa apertura media hora despois da exposición das fresas e con pases guiados polas hortas. Ás 18.30 horas haberá degustación gratuíta de fresas e ademais a disputa do torneo de fútbol masculino e feminino, cos encontros Eirís-Liceo de Monelos e Eirís-Novo Mesoiro.

Ás 19.00 horas actuará Paco Nogueiras para o público infantil e unha hora máis tarde será A Trova Coruñesa a que ofreza un recital. Xa ás 22.00 horas haberá un concerto a cargo de Culimaia, para pechar a xornada cunha verbena protagonizada pola orquestra Marbella.

Do 25 ao 29 de agosto as festas chegarán a Novo Mesoiro, que terá un amplo programa de actos. Así, o xoves, ás 20.00 horas, haberá mexillonada nos locais Mi Barrio, A do Cuñado e O Roncudo. O venres, sesión de danza africana e percusión coa ONG Porqueno? e a partir das 22.00 horas, rock alternativo con Aphonic, Strikeback e Morguen. O sábado, a partir das 10.00 horas, comezarán as actividades con deportes, crossfit gratuíto e baloncesto; ao que seguirán os tradicionais pasacalles e a sesión vermú a cargo da orquestra A Favorita, a partir das 13.30 horas, que repetirá á noite a partir das 22.00 horas, coa presenza tamén do DJ Javito. Pola tarde, será de novo a quenda para o deporte, con fútbol feminino e balonmán.

O domingo a sesión vermú será ás 13.00 horas e estará protagonizada por Virtual Project e a esa mesma hora celebrarase unha churrascada e pulpada. Pola tarde, a partir das 17.00 horas, a xornada estará dedicada aos máis pequenos, con actuacións do músico Pablo Díaz, o grupo Música Maestro e o mago Román. O luns, 29, acabaranse os festexos coa celebración do Día do Neno e coa habilitación das atraccións a metade de prezo.